குறிச்சொற்கள் » கட்டுரைகள்

புதிய தலைமுறை : பயோடேட்டா

வேலை நமதே தொடர் – 1

“இந்த புரஃபைல் நல்லா இருக்கு, ஆனா கேன்டிடேட்டை கான்டாக்ட் பண்ண முடியல”

என்னுடைய மேஜையில் ஒரு பயோடேட்டாவை வைத்து விட்டுச் சொன்னார் புராஜக்ட் மேனேஜர் ஒருவர். நான் பயோடேட்டாவைப் புரட்டிப் பார்த்தேன். எங்கள் நிறுவனத்துக்கு தேவையான எல்லா திறமைகளும் அந்த பயோடேட்டாவில் இருந்தன.

புரஃபைலின் மேல்பகுதியில் பார்த்தேன். மொபைல் நம்பர் எழுதப்பட்டிருந்தது. அழைத்தேன். “நீங்கள் தொடர்பு கொள்ளும் எண்ணைச் சரிபார்க்கவும்” என சலிக்காமல் மறு முனை சொல்லிக் கொண்டிருந்தது. சற்றே உற்றுப் பார்த்தால், அந்த தொலைபேசி எண்ணில் ஒரு இலக்கம் மிஸ்ஸிங்.

போனில் தொடர்பு கொள்ள முடியாது என்பது புரிந்து போனது, சரி மின்னஞ்சல் முகவரிக்கு ஒரு தகவல் கொடுக்கலாம் என புரபைலைப் புரட்டிப் பார்த்தால் கடைசிப் பக்கத்தில் ஒரு மின்னஞ்சல் முகவரி குறிப்பிடப்பட்டிருந்தது. விக்னேஷ்_நெருப்புடா@ஜிமெயி.காம் என்றிருந்தது. மெலிதாகப் புன்னகைத்துக் கொண்டேன். “பிளீஸ் கால் மி” என ஒரு தகவலை அனுப்பிவிட்டு திரும்பினால், “டெலிவரி ஃபெயில்ட்” என செய்தி கண்சிமிட்டியது.

அந்த புரஃபைலை மீண்டும் ஒரு முறை புரட்டினேன். எல்லா தகுதிகளும் இருந்தும், எல்லாம் படித்திருந்தும் இந்தப் பையனை தொடர்பு கொள்ள முடியவில்லையே என நினைத்துக் கொண்டே அதை ஓரமாய்த் தூக்கிப் போட்டேன்.

பயோடேட்டா என்பது ஒரு வீட்டைத் திறக்கும் சாவியைப் போன்றது. சரியான சாவி, சரியான நேரத்தில் கையில் இல்லாவிட்டால் வீட்டைத் திறப்பது சாத்தியமில்லாத ஒன்று. என்னதான் அழகிய வீட்டைக் கட்டி, எல்லா அறைகளிலும் ஏசி மாட்டியிருந்தாலும் சாவி இல்லாம என்ன பண்ண ?

ஒரு பயோடேட்டால என்ன இருக்கு ? என நீங்கள் நினைக்கலாம். உண்மையில், அதில் தான் எல்லா விஷயங்களும் இருக்கின்றன. ஒரு பயோடேட்டா ஒரு அதிகாரியை பத்து முதல் பதினைந்து வினாடிகளுக்குள் வசீகரிக்க வேண்டும். இல்லையேல் அது வேஸ்ட் என முடிவுகட்டி விடலாம்.

நீங்கள் ஒரு புத்தகக் கடைக்குப் போகிறீர்கள் என வைத்துக் கொள்ளுங்கள். வரிசை வரிசையாய் எக்கச்சக்கமான புத்தகங்கள் இருக்கின்றன. எல்லாமே புதிய எழுத்தாளர்களின் நூல்கள்.  எதை எடுப்பீர்கள் ? எந்த புத்தகம் உங்களுடைய பார்வையை சட்டென இழுக்கிறதோ அந்த புத்தகத்தை ! அப்படித் தானே ? அப்படி எடுக்கின்ற புத்தகத்தை எத்தனை வினாடிகள் புரட்டிப் பார்ப்பீர்கள் ? அதிகபட்சம் 30..40 வினாடிகள் அவ்வளவு தான்.

அந்த நேரத்தில் அந்த நூல் உங்களை வசீகரித்தால், மேலும் சில நிமிடங்கள் செலவிட்டு அந்த நூலை வாங்கலாமா வேண்டாமா என முடிவெடுப்பீர்கள். முதல் பத்து இருபது வினாடிகளில் அந்த நூலின் அட்டையோ, தலைப்போ, பின்னட்டை வாசகங்களோ ஏதோ ஒன்று உங்களை வசீகரிக்காவிடில் அப்படியே போட்டு விட்டு அடுத்த புத்தகத்தை எடுப்பீர்கள்.

ஒரு சினிமா போஸ்டரைப் பார்க்கிறீர்கள். சில போஸ்டர்களைப் பார்த்ததும் “அட, போய் பாக்கலாமே” என தோன்றும். சில போஸ்டர்கள் சலனப்படுத்துவதில்லை. அப்படித் தான் புரஃபைல்.

வசீகரமான சுருக்கமான பயோடேட்டா தான் மிக முக்கியம். உங்களுடைய தொடர்பு தகவல்கள் மிகச்சரியாக, மிகத்தெளிவாக இருக்க வேண்டியது மிக மிக முக்கியம். முதல் பக்கத்திலேயே, நெற்றியிலேயே அந்த இரண்டு தகவல்களும் வருவது போல அமைத்துக் கொள்ளுங்கள்.

ஒருவேளை உங்களுடைய தொலைபேசி எண் மாற்றப்பட்டால், உடனே பயோடேட்டாவிலும் மாற்றிவிடுங்கள். பழைய காலம் போல டைப் பண்ணியோ, பிரிண்ட் அவுட் எடுத்தோ, பயோடேட்டாக்களை கட்டுக்கட்டாய் சுமந்து செல்லும் காலம் இப்போது இல்லை. எல்லாம் டிஜிடல் மயம். கொஞ்சம் கவனம் செலுத்தி எண்களை சரி செய்யவேண்டும் அவ்வளவு தான்.

அதே போல உங்களுடைய மின்னஞ்சல் முகவரியும் தெளிவாக இருக்க வேண்டும். மின்னஞ்சலை முடிந்தவரை ஜிமெயில், யாகூ போன்ற தளங்களில் வைத்திருங்கள். ஏகப்பட்ட குட்டிக் குட்டி மின்னஞ்சல் தளங்கள் உண்டு, அவற்றை விட்டு விடுங்கள். அதே போல மின்னஞ்சல்களை விக்னேஷ்@குமார்.காம் போல “கஸ்டமைஸ்” செய்வதும் வேண்டாம். முடிந்தவரை சிம்பிளாக வைத்திருங்கள்.

இன்னொரு முக்கியமான விஷயம். கல்லூரி காலத்துக்கும், வேலை தேடும் காலத்துக்கும் ரொம்பவே வித்தியாசம் உண்டு. கல்லூரி காலத்தில் உங்களுடைய பட்டப்பெயர்களுக்கு தனி மரியாதை இருக்கும். மிஸ்டர் பாடி பில்டர், மிஸ் சாஃப்ட்வேர், மிஸ் பிஸிக்ஸ் போன்ற பெயர்களையெல்லாம் கல்லூரியிலேயே விட்டு விடுங்கள்.

பல புரஃபைல்களில் மின்னஞ்சல் முகவரிகளை 007, சூப்பர், 09191995எபிசி என்றெல்லாம் வைக்கிறார்கள். அதெல்லாம் உங்களுடைய பெயரை நீங்களே கெடுத்துக் கொள்வது போல. சொந்தக் காசில் சூனியம் என்று சொல்லுவாங்களே, அது போன்ற விஷயம் அது. உங்கள் பெயர், கூடவே ஒரு சின்ன அடையாளம் அதுவே போதுமானது. உதாரணம் விக்னேஷ்1995@ஜிமெயில்.காம் போல. அது நீங்கள் தினமும் பயன்படுத்தும் மின்னஞ்சலாய் இருக்கட்டும்.

பயோடேட்டா என்பது என்ன ? சுருக்கமாகச் சொல்லவேண்டுமெனில் நீங்கள் யார் என்பதை இன்னொருவருக்கு சுருக்கமாக, தெளிவாகச் சொல்லும் ஒரு டாக்குமென்ட். வேலைக்கான விஷயம் என்பதால் உங்களுடைய தொழில்நுட்பம் சார்ந்த விஷயங்களை அதில் பதிவு செய்கிறீர்கள் அவ்வளவு தான்.

சோ, பயோடேட்டாவில் நாம் கவனிக்க வேண்டியது ரெண்டே ரெண்டு விஷயங்கள் தான். ஒண்ணு, என்ன சொல்லப் போகிறோம் என்பது. ரெண்டு, எப்படிச் சொல்லப் போகிறோம் என்பது.

எந்த வேலைக்கு முயற்சி செய்கிறீர்களோ அந்த வேலைக்கான அம்சங்களை நீங்கள் பயோடேட்டாவில் இருக்கவேண்டும் என்பது பாலபாடம். உதாரணமாக, நீங்கள் ஒரு பத்திரிகையில் வேலைக்கு விண்ணப்பித்தால் நீங்கள் கதை எழுதுவதையும், கவிதை எழுதுவதையும் குறிப்பிடலாம். அதே நேரம் நீங்கள் மெக்கானிக் வேலைக்கு முயல்கிறீர்களெனில் உங்களுடைய கவிதைத் திறமை அங்கே தேவைப்படாது !

எனவே பயோடேட்டா என்பது ஒரு கூட்டாஞ்சோறு எனும் சிந்தனையிலிருந்து வெளியே வாருங்கள். இப்போதும் என்னிடம் வருகின்ற புரஃபைல்களில் ஓட்டப்பந்தயத்தில் முதல் பரிசு வாங்கினேன், என்னுடைய உயரம் 167 செமீ என்றெல்லாம் குறிப்பிடப்பட்டிருப்பதைப் பார்க்கிறேன். ஒரு ஐடி நிறுவனத்தில் பணிபுரிய வருபவர் 167 செமீ இருந்தால் என்ன 183 சென்டீமீட்டராய் இருந்தால் என்ன என்பது எனக்கு விளங்கவில்லை.

நீங்கள் விண்ணப்பிக்கப் போகும் நிறுவனத்தைப் பற்றி முதலில் கொஞ்சம் தெரிந்து கொள்ளுங்கள். அவர்கள் என்ன எதிர்பார்க்கிறார்கள் என்பதைப் பாருங்கள். அந்த திறமை உங்களிடம் இருக்கிறதா என்பதைப் பாருங்கள். இல்லையா ? அதே போன்ற வேறு திறமைகள் இருக்கிறதா என்பதைப் பாருங்கள். அந்த விஷயங்களையெல்லாம் புரஃபைலின் முதல் பக்கத்தில் போடுங்கள். மீண்டும் சொல்கிறேன், முதல் பக்கத்தில் போடுங்கள்.

ஒவ்வொரு நிறுவனமும் ஒரு சில குறிப்பிட்ட வார்த்தைப் பிரயோகங்களை வைத்திருப்பார்கள். அதே வார்த்தைப் பிரயோகத்தை நீங்களும் வைத்தால் சட்டென கவனிக்கப்படுவீர்கள். பூவை, பூ என்றும் சொல்லலாம், புஷ்பம் என்றும் சொல்லலாம். அந்த நிறுவனம் எப்படிச் சொல்கிறதோ அப்படிச் சொல்லிவிட்டுப் போவோமே. மலையாளியின் டீ கடைக்கு போய், “சேட்டா ஒரு சாய” என்று சொன்னால் புன்னகையுடன் முகத்தைப் பார்ப்பார் இல்லையா ?. அப்படி ஒரு யுத்தி தான் இந்த வார்த்தைப் பிரயோகம்.

விஷயத்தை எப்படிப் போடுவது என்பது இரண்டாவது. சில வீட்டுக்குப் போனால் அப்படியே கண்ணில் ஒற்றிக் கொள்ளலாம் போல பளிச் என வைத்திருப்பார்கள். வீடு சின்னதாய் இருந்தாலும் நேர்த்தியாய் இருக்கும். அதது இருக்க வேண்டிய இடத்தில் கட்சிதமாய் இருக்கும். அங்கே ஆர அமர உட்கார்ந்து ரிலாக்ஸ் ஆக பேசுவோம்.

சில வீடுகள் மேத்யூ கடந்து சென்ற ஃப்ளோரிடா போல சிதறி சின்னாபின்னமாகிக் கிடக்கும். நுழைந்ததும் எங்கே அமர்வது என்பதில் தொடங்கி, எவ்வளவு நேரம் தான் இங்கே அமர முடியும் என்பது வரை சிந்தனை ஓடிக்கொண்டே இருக்கும். எதுவும் அதனதன் இடத்தில் இருக்காது. விட்டா போதும் சாமி என ஓடியே போய்விடுவோம்.

பயோடேட்டாவும் இப்படி இரண்டு வகைகளில் இருக்கும். ஒன்று நேர்த்தியாய். ஒன்னொன்று ஒழுங்கின்மையாய். இரண்டிலும் இருக்கும் விஷயங்கள் ஒரே மாதிரி இருந்தாலும், இரண்டையும் முன்வைக்கின்ற விதம் வேறுபடும். பிரசன்டேஷன் முக்கியம்.

நல்ல பயோடேட்டா சுவாரஸ்யமாய்ப் பேசுகின்ற நண்பனைப் போல இருக்க வேண்டும். சுவாரஸ்யமான நண்பன் குறைவாய் பேசுவான், பேசுவதையெல்லாம் சுவாரஸ்யமாய்ப் பேசுவான். சில நண்பர்களைக் கண்டால் பின்னங்கால் பிடரியில் பட ஓடியே போய்விடுவோம். அவர்கள் பேசிக் கொல்பவர்கள்.

நல்ல பயோடேட்டாவும் அப்படித் தான். சுருக்கமாக இருக்கவேண்டும் மனதுக்கு நெருக்கமாக இருக்க வேண்டும். சொல்ல வேண்டிய தகவல்களை மிக மிகச் சுருக்கமாக பதிவு செய்ய வேண்டும் அவ்வளவு தான். பயோடேட்டா என்பது நாவலல்ல. அப்படி நீட்டி முழக்கவே கூடாது. சுருக்கமாய் இருக்க வேண்டும்.

பயோடேட்டாவில் நம்முடைய இலக்கியத் திறமையையும், ஆங்கிலத் திறமையையும் காட்டத் தேவையே இல்லை. இதொன்றும் நவீன கவிதைப் பத்திரிகையல்ல. அல்லது ராக்கெட் சயின்ஸ் ஆய்வுக்கட்டுரையும் அல்ல. ரொம்ப எளிய ஆங்கிலத்தில், நேரடியாக விஷயங்கள் இருக்க வேண்டும். எனக்கு இந்தெந்த விஷயங்கள் தெரியும், இன்னின்ன சான்றிதழ் பயிற்சி எடுத்திருக்கிறேன், இந்த ஏரியாவில் எனக்கு எக்ஸ்பீரியன்ஸ் உண்டு, என்னுடைய கல்வித் தகுதி இவை, என்னுடைய பலம் இவை என பளிச் என நேரடியாக இருக்க வேண்டும்.

ஒரு சில பக்கங்களில் தெளிவாக பயோடேட்டாவை முடித்து விடுங்கள். அதற்காக எழுத்துருவைச் சுருக்கி எழுத்துகளை ஷேர் ஆட்டோவில் முண்டியடிக்கும் சென்னைவாசிகளைப் போல நெருக்காதீர்கள். வாசிப்பவர்களுக்கே அது மூச்சு முட்டும். தேவையற்ற விஷயங்களை வெட்டி எறியுங்கள். தேவையான விஷயங்கள் இருக்க வேண்டியது எவ்வளவு அவசியமோ, தேவையற்ற விஷயங்கள் இல்லாமல் இருக்க வேண்டியதும் அவ்வளவு அவசியம்.

எழுத்துரு இயல்பாக, சாதாரணமாக இருக்கட்டும். உங்கள் பயோடேட்டாவை வாசிப்பவர் உங்கள் வயசுக்காரராகவோ, உங்கள் ரசனைக்காரராகவோ இருக்க வேண்டுமென்று அவசியமில்லை. சுருளிராஜனின் முடியைப் போலவோ, கிரிஸ் கேல்ஸின் சடையைப் போலவோ ஸ்டைல் காட்டத் தேவையில்லை. சாதாரண எழுத்துருவே ரொம்பச் சரி.

புல்லட் பாயின்ட்ஸ் போடலாம். அதே போல சில முக்கியமான வார்த்தைகளை ‘போல்ட்” செய்யலாம். அடிக்கோடிடாதீர்கள். உதாரணமாக நான் ஒரு ஜாவா சர்டிஃபைட் புரஃபஷனல் எனும் வாக்கியத்தில் “ஜாவா சர்டிஃபைட்” எனும் வார்த்தைகளை போல்ட் செய்யலாம். அப்போது வேகமாய்ப் புரட்டுபவர் கூட ஒரு வினாடி தன்னையறியாமலேயே அதை வாசிப்பார். அப்படி தேவையான நான்கைந்து வார்த்தைகளை நீங்கள் போல்ட் செய்யலாம்.

இன்னொரு முக்கியமான விஷயம், பயோடேட்டா உங்களுடைய வாழ்க்கை வரலாறு அல்ல. நீங்கள் குப்புறப் படுத்து தலை நிமிர்ந்த நாள் தொடங்கிய விஷயங்களெல்லாம் அதில் இருக்க வேண்டிய தேவை இல்லை. சமீபத்திய‌ ஆண்டுகள் தான் முக்கியம். பள்ளி இறுதி ஆண்டுக்குப் பின் என வைத்துக் கொள்ளலாம். அதுவும் தேவைக்கேற்ப, நிறுவனத்துக்கேற்ப அதை உருவாக்க வேண்டும்.

பயோடேட்டா என்பது மிக முக்கியமான முதன்மையான விஷயம். எனவே தான் இதை தயாரித்துத் தர பல்வேறு நிறுவனங்கள் இருக்கின்றன. அவர்கள் உங்களிடமிருந்து தகவல்களை வாங்கி அவற்றை ஸ்டைலான பயோடேட்டாவாக‌ உருவாக்கித் தெருகின்றன. அதற்காக பல்லாயிரம் ரூபாய்களை அவை கட்டணமாகப் பெறுகின்றன. நாம சமைச்ச சாப்பாட்டை நம்மிடமிருந்து வாங்கி நமக்கே பரிமாறி நம்மிடம் பணம் வாங்கும் நிறுவனங்கள் நமக்கெதுக்கு ? நாமே தயாராக்குவோம் நம்முடைய பயோடேட்டாவை.

கடைசியாக ஒரு நினைவூட்டல். பயோடேட்டா தெளிவாக, எளிமையாக, நல்ல எழுத்துருவில் இருக்கட்டும். தேவையான அம்சங்கள் முதல் பக்கத்தில் இடம்பெறட்டும். தேவையற்ற அம்சங்கள் இடம்பெற வேண்டாம். தொடர்பு தகவல்கள் தெளிவாக இருக்கட்டும். பயோடேட்டாவில் இருக்கும் விஷயங்களெல்லாம் உண்மையாய் இருக்கட்டும்.

பத்து  கட்டளைகள்

  1. பயோடேட்டா வாசிப்பவரை முதல் இருபது வினாடிகளுக்குள் கவரவேண்டும்.

  1. முதல் பக்கம் மிக மிக முக்கியம். உங்களுடைய பலம் அந்த பக்கத்தில் பளிச் என தெரிய வேண்டும்.

  1. கான்டாக்ட் தகவல்களான இமெயில், தொலைபேசி எண், அலைபேசி எண் எல்லாம் சரியாய், தெளிவாய் இருக்கட்டும்.

  1. பயோடேட்டாக்களை நிறுவனங்களின் தன்மைக்கு ஏற்ப மாற்றியமைத்துக் கொள்ளுங்கள்.

  1. இரண்டு அல்லது மூன்று பக்கங்களைத் தாண்ட வேண்டாம். தேவையற்ற பொது தகவல்களை தவிருங்கள்.

  1. கல்வித் தகுதி, சர்டிபிகேஷன்ஸ்,பயிற்சிகள், பயிலரங்கங்கள் போன்ற தகவல்களை தவறாமல் முதல் பக்கத்தில் குறிப்பிடுங்கள்.

  1. எளிமையான ஆங்கிலத்தில், தெளிவான எழுத்துருவில், தேவையான இடைவெளி விட்டு எழுதுங்கள். பல வண்ணம், இட்டாலிக்ஸ், அடிக்கோடிடுதல் போன்றவற்றை தவிருங்கள்.

  1. நிறுவனம் எதிர்பார்க்கும் தகுதி சார்ந்தவற்றை முன்னிலைப்படுத்துங்கள்.

  1. இணையத்தில் நிறைய சாம்பிள் ‘டெம்ப்ளேட்கள்’ கிடைக்கின்றன, அவற்றைப் பயன்படுத்திக் கொள்ளுங்கள்.

  1. பயோடேட்டாவில் நெகடிவ் விஷயங்கள் எதையும் போடாதீர்கள்.

சேவியர்

TOP 10 : புராண வில்லன்கள்

புராணங்களிலும், காவியங்களிலும், ஆன்மீக நூல்களிலும் பல வில்லன்கள் உலா வருகின்றனர். நிகழ்கால வில்லன்களுக்கு சவால் விடும் வகையில் அவர்களுடைய வாழ்க்கை இருக்கிறது. புனைவாகவும், நிஜமாகவும் இருக்கும் அத்தகைய இதிகாச, காவிய வில்லன்களில் ஒரு பத்து பேர் இந்த வாரம்.

சேவியர்

பொருளியல் மாயையும்- தற்குறிப்பேற்ற அணியும்

அங்கு குளத்தில் மிதந்துவருவது என்ன.? செருப்பா இல்லை மீனா..? எனக்கென்னவோ செருப்புபோல் தெரிகிறது. இல்லை மீன்போல் தெரிகிறது. இல்லைஅது செருப்புதான், இல்லை அது மீன்தான்…

உண்மையில் அது செருப்பாகவோ அல்லது மீனாகவோ அல்லது வேறொன்றாகவோகூட இருக்கலாம்.

கட்டுரைகள்

TOP 10 : தன்னம்பிக்கை நூல்கள்

தன்னம்பிக்கை நூல்களுக்கு என்றுமே பஞ்சம் இருந்ததில்லை. ஏராளமான நூல்கள் வாசகர்களின் தன்னம்பிக்கையைத் தட்டி எழுப்பும் பணியைச் செய்திருக்கின்றன, செய்து வருகின்றன. அவற்றில் விமர்சகர்களின் பார்வையிலும், வாசகர்களின் பார்வையிலும், விற்பனையின் எண்ணிக்கையிலும் சர்வதேச கவனத்தை ஈர்த்த நூல்கள் ஏராளம்.

கட்டுரைகள்

ரஜினியும், இசைஞானியும் #HBDRaja

 

 

சூப்பர் ஸ்டார் ரஜினியின் திரைப்படங்களில் இசைஞானி இளையராஜாவின் பங்களிப்பு மறக்க முடியாதது. இன்றும் ரீங்காரமிடும் காலத்தால் அழியாத நூற்றுக்கணக்கான பாடல்களை இசைஞானி ரஜினிக்காக அளித்திருக்கிறார். அவை திரையில் ரஜினியின் ஆளுமையோடு இணைந்து நீங்கா விருந்தாக நிலைபெற்றிருக்கின்றன‌.

அது போல பின்னணி இசையில் மிரட்டிய பல்வேறு படங்களையும் இசைஞானி ரஜினிக்கு வழங்கியிருக்கிறார். பின்னணி இசைக்கு ஒரு அர்த்தம் கொண்டு வந்தது இசைஞானி இளையராஜா என தைரியமாகச் சொல்லலாம். படம் முழுவதும் இணைந்து பயணிக்கும் சீரான இசையும். சற்றும் தொய்வில்லாமல் உணர்வுகளை தாங்கிப் பிடிக்கும் இசையும். கண்களை மூடிக் கொண்டு கேட்டால் கூட படத்தின் ஒவ்வொரு காட்சியையும் துல்லியமாய் உணர முடிகின்ற பின்னணி இசையும், இசைஞானியின் அசுர பலம்.

இருவரும் திரைக்கு வெளியேயும் நெருங்கிய நட்பு பாராட்டுகின்றனர் என்பது சிறப்புச் செய்தி. இசைஞானியை ரஜினி, “சாமி” என்று தான் அழைப்பார். இசை கடவுளின் வரம், இசைக்கலைஞர் கடவுளின் வரம் பெற்றவர் எனும் கருந்து ரஜினிக்கு எப்போதுமே உண்டு. ஆன்மீகவாதியான ரஜினி, இன்னொரு ஆன்மீகவாதியான இசைஞானியுடன் பக்தியுடன் தான் பழகினார். அடிக்கடி இருவரும் சந்தித்துக் கொள்வதும் அன்பை பரிமாறிக் கொள்வதும் சகஜ நிகழ்வுகள். இருவரைக் குறித்தும் விமர்சனங்கள் தவறாக வந்த போதும் ரஜினியோ, இசைஞானியோ அதை கண்டு கொள்ளவில்லை. காரணம் அவர்களுடைய நட்பு எப்படி என்பதை இன்னொருவர் சொல்லி அறியும் நிலையில் அவர்கள் இல்லை என்பது தான்.

ரஜினியோடு, இசைஞானி இணைந்த முதல் படம் கவிக்குயில். சின்னக் கண்ணன் அழைக்கிறான் என மறக்க முடியாத ஒரு மெலடியுடன் ரஜினி இளையராஜா கைகுலுக்கல் ஆரம்பித்தது. பாலமுரளி கிருஷ்ணா அவர்களின் குரலும், இசைஞானியின் இசையும் கவிக்குயில் படத்தின் அடையாளமாக சின்னக் கண்ணனை நிலை நிறுத்தி விட்டன.

ரஜினியும் இசைஞானியும் கடைசியாக இணைந்த படம் வீரா. கொஞ்சிக் கொஞ்சி அலைகள் ஓட எனும் பாடல் ஒன்றே போதும் வீராவின் புகழைப் பேச. அந்த அளவுக்கு ரசிகர்களையும், இசை பிரியர்களையும் கட்டிப் போட்ட பாடல் அது. அந்தப் படத்தில் மொத்தம் ஒன்பது பாடல்கள் மலைக்கோயில் வாசலில், மாடத்திலே கன்னி மாடத்திலே என பாடல்கள் எல்லாமே சூப்பர் ஹிட்டான படம் வீரா !

இசைஞானி ரஜினிக்கு அளித்த பாடல்கள் பெரும்பாலானவை ஹிட் ரகம் தான். அதில் குறிப்பிட்டுச் சொல்லக் கூடிய பாடல்கள் நிறைய உண்டு.

வயலினை வைத்துக் கொண்டு மனித உணர்வுகளை அந்த இழைகள் வழியாய் இழைத்துச் செதுக்குவதில் இசைஞானிக்கு நிகராய் இன்னொருவர் திரையுலகில் இல்லை என்று தான் சொல்ல வேண்டும். வயலினும், கிட்டாரும் அவருடைய இசைப் பயணத்தின் வலிமையான கருவிகளாக கூடவே பயணிக்கின்றன.  தளபதி படத்தில் வரும், “சின்னத்தாயவள் தந்த ராசாவே” பாடலில் பயணிக்கும் வயலினின் உயிரோட்டம் நெஞ்சைப் பிழியும் ரகம்.

சின்னத்தாயவள் படத்தில் வயலின் மனதைப் பிழிந்தது என்றால் அப்படியே தம்பிக்கு எந்த ஊரு படத்தில் வரும், “என் வாழ்விலே வருமன்பே வா” பாடலில் சந்தோசமான மனநிலைக்கு நம்மை இட்டுச் செல்கிறது. ஆறிலிருந்து அறுபது வரை படத்தில் வருகின்ற கண்மணியே காதல் என்பது கற்பனையோ பாடலில் இழையோடும் வயலின் ஆனந்தத்தை அடுத்த கட்டத்துக்கு எடுத்துச் செல்கிறது, இந்தப் பாடலில் கூடவே பயணிக்கும் வீணையும், நாதஸ்வரமும் பாடலை அற்புதமாக்கி விடுகின்றன.

சர்வதேச அளவில் இசைஞானிக்கு அங்கீகாரம் கொடுத்த ராக்கம்மா கையத் தட்டு பாடலில் துள்ளி விளையாடும் வயலினின் விஸ்வரூபம் இசை ரசிகர்களின் இதய சிம்மாசனத்தில் எப்போதுமே இருக்கும். உன் கண்ணில் நீர் வழிந்தால் படத்தில் வருகின்ற, “கண்ணில் என்ன கார் காலம்” பாடல் காதலின் நினைவுகளைத் தூண்டி எழுப்பும் ரகம். கிட்டாரும், வயலினும் தலைகாட்டாத இசைஞானி பாடல்கள் உண்டா என்பதில் எனக்கு சந்தேகமே.

தங்க மகன் படத்தில் வரும், “ராத்திரியில் பூத்திருக்கும் தாமரை தான் பெண்ணோ” பாடல் புதுமையானது. அதில் முழு சரணத்தையுமே பெண் பாடல் குழு வைத்து பண்ணியிருப்பார் ராஜா. கிட்டாரின் இனிமையையும், பாடகர்களின் குரலையும் இணைத்துக் கட்டிய அந்தப் பாடல் ஒரு புதுமையான அனுபவம்.  கூட்டிசையின் நுணுங்கள் ராஜாவுக்கு அத்துபடி என்பதன் சின்ன உதாரணம் தான் இது.

குரல்களை வைத்து ஜாலம் காட்டிய இசைஞானியின் பாடல்கள் இதே போல எக்கச்சக்கம் உண்டு. அத்தகைய முயற்சிகளில் ஆரம்ப காலங்களில் அசத்தியது கழுகு படத்தில் இடம்பெற்ற பொன் ஓவியம் பாடல்தான். இன்றும் அந்தப் பாடலில் இசைஞானி பயன்படுத்தியிருக்கும் குரல்களின் கோர்வை, நல்லிணக்கம், கூட்டிசை வியக்க வைக்கிறது. இன்றைய தொழில்நுட்பத்தில் அந்த சாத்தியம் எளிது, எந்த தொழில் நுட்ப ஒட்டு வேலைகளும் இல்லாத அந்த காலத்தில் அவர் செய்த அந்தப் பாடல் அசாத்தியமானது. அதே போல ஜானி படத்தில் வரும் ஆசையக் காத்துல தூது விட்டு பாடலில் இடையிடையே வருகின்ற கூட்டிசை பிரமிப்பானது.

சோகத்தைப் பிழிந்தாலும் கூடவே உணர்வுகளின் ஊர்வலத்தை இணைக்கும் இசைஞானியின் பாடல்கள் எக்கச்சக்கம். எப்போதும் மறக்காத பாடல்களில் ஒன்றாக ரஜினியின் மன்னன் பட பாடலைச் சொல்லலாம். அந்த பாடலுக்கு கரையாத மனம் உண்டோ ? இசை பிரியர்கள் முதல் சாதாரண ரசிகர்கள் வரை அந்தப் பாடல் உருவாக்கிய அதிர்வு எக்கச்சக்கம்.

பிரியா படத்தில் பாடல்கள் எல்லாமே அற்புத வகை. முதன் முதலாக ஸ்டீரியோ போனிக் அறிமுகப்படுத்தி பாடல்களையெல்லாம் ராஜா இதில் சூப்பர் டூப்பர் ஹிட்டாக்கினார். பிரியா படத்தின் பெரிய‌ வெற்றிக்கு இது முக்கிய காரணமானது.

தளபதி, ஜானி, படிக்காதவன், வீரா, எஜமான், உழைப்பாளி, மன்னன், தர்மதுரை, பணக்காரன், மாப்பிள்ளை, ராஜாதிராஜா, தர்மத்தின் தலைவன், வேலைக்காரன் போன்ற படங்களில் எல்லா பாடல்களுமே அற்புதப் பாடல்களாய் அமைந்திருந்தன என்று சொல்லலாம். படத்தின் வெற்றிக்கு பெரிய பங்களிப்பை இசை ஆற்றிய படங்களில் இவை முக்கியமானவை.

தர்மயுத்தம் படத்தில் மலேசியா வாசுதேவன், எஸ்.ஜானகி குரலில் ஒலிக்கும் ஆகாய கங்கை பாடல் எப்போதும் சிலிர்ப்பூட்டுகிறது. முரட்டுக்காளையில் மலேஷியா வாசுதேவனின் மந்திரக் குரலில் ஒலிக்கும் அண்ணனுக்கு ஜே பாடலும், ஜானகி குரலில் எந்தப் பூவிலும் வாசம் உண்டு பாடலும் இசைஞானியில் முத்திரைகள்.

சந்தனக் காற்றே, செந்தமிழ் ஊற்றே சந்தோசப் பாட்டே வாவா.. என மனதை இழுக்கின்ற தனிக்காட்டு ராஜா பாடலில் இசைஞானியும், எஸ்.பி.பி ஜானகி இணையும் போட்டி போட்டிருப்பார்கள். காதலின் நயாகரா காதுகளில் கொட்டும் இன்பம் அந்தப் பாடலுக்கு உண்டு

இசைஞானியின் இசையில் மறக்க முடியாத இன்னொரு ரஜினி படம் புதுக்கவிதை. வெள்ளைப் புறா ஒன்று பாடல் ரஜினி பாடல்களில் மிக முக்கியமானது. இதே படத்தில் வருகின்ற இன்னொரு அசத்தல் பாடலாக வா வா வசந்தமே பாடலைச் சொல்லலாம்.

ஆசை நூறு வகை வாழ்வில் நூறு சுவை வா… பாடலுக்கு ஆடாத கால்கள் இருக்க முடியாது. அடுத்த வாரிசு படத்தின் வெற்றிக்கும், பிரபலத்துக்கும் இந்தப் பாடல் ஒரு முக்கிய காரணியாய் அமைந்தது. ஆசை நூறு வகை அதிரடி என்றால், இன்னொரு பாடலான பேசக் கூடாது பாடல் இரவின் தனிமையில் ஒலிக்கின்ற காதலின் புல்லாங்குழலாய் மனதை வசீகரிக்கிறது.

நான் மகான் அல்ல படத்தில் வருகின்ற, மாலை சூடும் வேளை பாடலும் சரி, தங்க மகன் படத்தில் வரும் வா வா பக்கம் வா பாடலும் சரி ரஜினியின் முத்திரைப் பாடல்கள். இரண்டு வேறுபட்ட மனநிலையில் ரசிக்க வைக்கின்ற பாடல்கள். தங்க மகன் படத்தில் இன்னொரு சூப்பர் டூப்பர் ஹிட் பாடல் என்றால் அது ராத்திரியில் பூத்திருக்கும் தாமரை தான் பெண்ணோ பாடல் தான். எஸ்பிபி ஜானகி இணையின் இன்னொரு மிரட்டல் ஹிட் பாடல் அது.

முத்துமணிச் சுடரே.. வா என மனதை பிசையும் பாடலான அன்புள்ள ரஜினிகாந்த் பாடல், படத்தில் பார்வையாளர்கள் கொண்டிருக்கும் உணர்வு பூர்வமான தொடர்பை நீட்டிப்பதாக இருக்கும். இந்தப் பாடல் அந்தப் படத்திற்கு எவ்வளவு தூரம் பக்க பலமாய் இருந்தது என்பது கண்கூடு.

காதலின் தீபம் ஒன்று ஏற்றினாளே பாடல் என்னை எப்போதுமே இனிமையாய் இம்சை செய்யும் பாடல்களில் ஒன்று. இசையும், குரலும், படமாக்கலும் என எல்லா வகையிலும் மனதுக்குள் ரீங்காரமிடும் பாடல்களில் ஒன்று இது. அதே போல, கை கொடுக்கும் கை படத்தில் வருகின்ற, தாழம் பூவே வாசம் வீசு பாடல் ஒரு வகையில் மனதுக்குள் நுழைந்து இம்சிக்கின்ற பாடல்.

அற்புதமான தாளகதி இசைஞானியின் பாடல்களின் உயிர் நாடி. ஒரு கிளாசிக் உதாரணம் சொல்ல வேண்டுமானால் நித்தம் நித்தம் நெல்லுச்சோறு பாடலைச் சொல்லலாம். முள்ளும் மலரும் படத்தில் இடம்பெற்ற பாடல் இது. தபேலா, மிருதங்கம், கதம் என இந்தியக் கருவிகள் அழகான தாளகதியில் உலவும் ஒரு பாடல் இது.

தபேலா, மொரோக்கோ, டிரம்ஸ் எனும் மூன்று தாளக் கருவிகளையும் ஒரு அற்புதமான புதுமை வரிசையில் இணைத்து கூடவே புல்லாங்குழலையும் நுழைத்திருக்கும் ஒரு பாடல் “அடுக்கு மல்லிகை இது ஆள் புடிக்குது” எனும் பாடல். தங்க மகன் படத்தில் இடம்பெற்றிருக்கும் அருமையான பாடல்களில் இதுவும் ஒன்று.

நல்லவனுக்கு நல்லவன் படத்தில் எல்லா பாடல்களுமே சிறப்பானவை என்று சுருக்கமாகச் சொல்லி விடலாம். சிட்டுக்கு செல்லச் சிட்டுக்கு பாடல் கண்ணீரை வரவழைக்கும் என்றால், நம்ம முதலாளி பாடல் உற்சாகத்தை ஊற்றெடுக்க வைக்கும், உன்னைத் தானே பாடல் காதலின் பறவைப் பாடலாய் காதுகளில் கூடுகட்டும், வச்சிக்கவா பாடல் சில்மிசத்தின் சிலந்தி வலையாய் நெஞ்சுக்குள் மஞ்சமிடும். ஒவ்வொரு பாடலும் ஒவ்வொரு ரகம்!

நான் சிகப்பு மனிதன் படத்தில் வருகின்ற, பெண் மானே சங்கீதம் பாடவா பாடலும், மிஸ்டர் பாரத் படத்தில் வரும் என்னம்மா கண்ணு பாடலும், வள்ளி படத்தில் வரும் என்னுள்ளே என்னுள்ளே பாடலும் எப்போதுமே ரசிகர்களின் காதுகளை நிராகரித்து நகர்வதில்லை.

இசைஞானி ஆன்மீகத்தின் கரைகளில் நடந்து திரியும் ஒரு சங்கீதப் பறவை. அவருடைய திருவாசகத்தின் அழுத்தம் இசைப் பிரியர்கள் நன்கு அறிந்தது. ஆடல் கலையே தெய்வம் தந்தது பாடலின் தெய்வீகத்தை இழைத்திருப்பார். ஸ்ரீராகவேந்திரா பாடல் ஏசுதாஸ் குரலில் இசைஞானியின் இன்னொரு முத்திரை !

ரஜினிக்கு இசைஞானி அளித்த ஹிட் பாடல்களைப்ப் பற்றிப் பேசினால் அது ஒரு தனி நூலாகவே வெளியிடும் அளவுக்கு சுவாரஸ்யமானது. அதை விட முக்கியமாக இசைஞானி அவர்கள் ரஜினிக்கு அளித்த பின்னணி இசைக்கோர்வை தான் மிரட்டலானது. பல படங்கள் வரலாற்றில் அழிக்க முடியாத இடத்தில் இருக்கின்றன.

முள்ளும் மலரும், ஜானி, பிரியா, தளபதி என நிறைய படங்கள் பின்னணி இசையின் அற்புத பயணத்துக்கு உதாரணங்கள்.

இசைஞானி இளையராஜா தமித் திரையுலகிற்குக் கிடைத்த வரப்பிரசாதம் என்றால் மிகையல்ல. சூப்பர் ஸ்டாரின் பாடல்கள் ஹிட் ஆவதற்கு இசைஞானி தான் வேண்டுமென்பதில்லை. ரஜினியின் திரை ஆளுமை, அவருடைய ஸ்டைல், மாஸ் மேனரிசம் அனைத்துமே பாடல்களை ஹிட்டாக்கி விடும். ஏ.ஆர்.ரஹ்மான், தேவா, சங்கர் கணேஷ், சந்திரபோஸ், வித்யாசாகர் என பலரும் ரஜினிக்கு மிகப்பெரிய ஹிட் பாடல்களைக் கொடுத்திருக்கிறார்கள் என்பதையும் மறுப்பதற்கில்லை.

ஆனால் ரஜினியோடு பல மொழிகளில் மொத்தம் 65 படங்கள் வரை பணியாற்றியிருக்கிறார் இசைஞானி இளையராஜா. ரஜினியின் அதிக படங்களுக்கு இசை இவர் தான். ரஜினியின் படங்களில் இன்றும் மென்மையாய் வருடும் பாடல்களில் பெரும்பாலானவை இசைஞானி இளையராஜா பாடல்களே. இளையராஜாவைத் தவிர்த்துவிட்டு ரஜினி படங்களின் இசையைப் பற்றிப் பேச முடியாது என்பதே யதார்த்தம் !

இசை மேதைகளைப் பற்றி அறிந்து கொள்வதல்ல முக்கியமான விஷயம், இசைக்கு நீ என்ன பங்களிப்பு செய்திருக்கிறாய் என்பதே முக்கியம் என்பார் இளையராஜா. அந்த வகையில் இசைஞானியின் இசைப் பங்களிப்பு தலைமுறை தாண்டியும் காற்றில் உலவும் கல்வெட்டாய் மாயம் காட்டி நிலைக்கும்.

இன்று 73வது பிறந்த நாள் காணும் இசைஞானிக்கு இதயம் நிறைந்த வாழ்த்துகள்

கட்டுரைகள்

முதலமைச்சர் அலுவலகம் முற்றுகைப் போராட்டம்

அருந்ததியர் உள் இட ஒதுக்கீடு அரசாணை எண்.50 தேதி 29.04.2009யை பயனற்று போகச் செய்யும் அரசாணை எண் 61-யை நீக்கம் செய்யக் கோரியும்…

கல்லூரி, பல்கலைக்கழகங்களில் அருந்ததியர் உள்இட ஒதுக்கீட்டை முறையாக பின்பற்ற கோரியும்…

ஆதித் தமிழர் கட்சியின் சார்பாக சென்னையில் 16.05.2017 அன்று முதலமைச்சர் அலுவலகத்தை முற்றுகையிடும் போராட்டம் நடைபெற்றது.

இதில் புரட்சிகர இளைஞர் முன்னணி, தந்தை பெரியார் திராவிடர் கழகம் உட்பட பல்வேறு அமைப்பினர் கலந்துக் கொண்டனர்.


கட்டுரைகள்

மன அழுத்தம் தவிர்ப்போம்

“உலகிலேயே அதிக மன அழுத்தம் இந்தியப் பெண்களுக்குத் தான் !! ”. அதிர்ச்சியாய் இருக்கிறதா ? வளர்ந்த மற்றும் வளரும் நாடுகளில் நடத்தப்பட்ட மிக விரிவான நீல்சன் ஆய்வு ஒன்று தான் இப்படிக் கூறி வெலவெலக்க வைக்கிறது ! சுமார் 87% சதவீதம் இந்தியப் பெண்கள் மன அழுத்தத்தில் உழல்கிறார்களாம் ! பெண்கள் முன்னேற்றத்தில் சீரான வளர்ச்சியையும், வெற்றிகளையும் சந்தித்துவரும் இந்தியாவில் ஏன் இந்த நிலை?

இந்தியப் பெண்கள், அலுவலகங்களில் 21ம் நூற்றாண்டின் புதுமைப் பெண்களாக உலா வருகின்றனர். ஆனால் பெரும்பாலான வீடுகளிலோ கற்காலக் கணவன்களின் சிந்தனைகளின் நிழலிலேயே வாழ்கின்றனர். இரண்டு வேறுபட்ட உலகங்களில் சஞ்சரிக்கும் நிலை அவளுக்கு மன அழுத்தம் தரும் நவீன காரணிகளில் ஒன்று ! இது தவிர குழந்தை, குட்டி, வீடு, வேலை, இத்யாதி இத்யாதி என மன அழுத்தத்துக்கான காரணங்கள் நீங்கள் அறியாததல்ல !

உலகில் மன அழுத்தத்தால் பாதிக்கப்பட்டிருப்பவர்களில் 85 சதவீதம் பேரும் பெண்கள் தான் ! எல்லா இடங்களிலும் வெற்றி வாகை சூடும் பெண்களால் ஏன் மன அழுத்த மதில் சுவரை மட்டும் எகிறிக் குதிக்க முடிவதில்லை ?

முயன்றால் முடியாதது இல்லை  ! கவலையை விடுங்கள் ! வழிகாட்டத் தான் உங்கள் கைகளில் தேவதை இருக்கிறாளே !

  1. நோ சொல்வதும் நாகரீகமே !

இளைச்சவன் தலையில மிளகாய் அரைப்பதில் அலுவலகங்கள் ஒன்றுக்கொன்று சளைத்ததல்ல. உங்கள் தலையில் சக பணியாளர்களோ, உயர் அதிகாரிகளோ ஏகப்பட்ட வேலையைச் சுமத்துகிறார்களா ?

“சாரி, என்னால இவ்ளோ தான் செய்ய முடியும்” என நாகரீகமாக மறுக்கப் பழகுங்கள். ஏற்றுக் கொள்ளும் வேலையை முழுமையாய்ச் செய்து முடிப்பது மன அழுத்தத்தில் விழாமல் காக்கும் வழிகளில் ஒன்று !

ஏகப்பட்ட வேலைகளை ஏற்றுக் கொள்வது, தேவையற்ற மன அழுத்தத்தை வரவேற்பது போல. மறுப்பது நல்ல பழக்கம் தான் ! முதலில் முடியாததாய்த் தோன்றும், பிறகு பழகி விடும்.

“முடியும்னு சொல்ற வேலையை சரியா முடிச்சுக் குடுத்துடுவாங்க” எனும் பெயரையும் நீங்கள் சம்பாதிக்கலாம் !

  1. புதிய கோணம், புத்துணர்வு தரும்.

உங்களுடைய பார்வை ஒவ்வொரு விஷயத்தையும் எப்படி எடுத்துக் கொள்கிறது என்பதைக் கவனியுங்கள். “ஐயோ இதெல்லாம் முடியாது..” என எடுத்த எடுப்பிலேயே தீர்மானிக்கிறதா ? “இதையெல்லாம் செய்யக் கூடாது” என மனம் முரண்டு பிடிக்கிறதா ? கண்டுபிடியுங்கள்.

அலுவலக வேலைகளைப் பொறுத்தவரை கஷ்டமும், சிக்கலும், எரிச்சலும் எழத் தான் செய்யும். ஒரு கஷ்டமான வேலை வந்தால், “இது உங்களை நிரூபிக்க ஒரு வாய்ப்பு” என எடுத்துக் கொள்ளுங்கள். அதை விட்டு விட்டு “கஷ்டத்தை எல்லாம் என் தலையில கட்டிடுவான்” என புலம்ப வேண்டாம் !

  1. மனதுக்கு மாற்று வழி..

 

மன அழுத்தமாக உணரும் தருணங்களில் மனசுக்குப் பிடித்த விஷயங்களைச் செய்வது, மனதை உற்சாகமாக்கும் என்பது உளவியல் பாடம். எனவே எப்போதும் கொஞ்சம் உற்சாகமான விஷயங்களை கை வசம் வைத்திருங்கள்.

அது ஒரு சின்ன பிரேக் எடுத்து ஒரு கதை படிப்பதாகவும் இருக்கலாம், டைரி எழுதுவதாகவும் இருக்கலாம், அல்லது இணையத்தில் உலவுவதாகவும் இருக்கலாம். உங்களுக்கு ஏற்ற, பிடித்த ஒரு ரிலாக்‌சேஷன் கைவசம் இருக்கட்டும்.

ஒன்றுமே இல்லையேல் கண்களை மூடி, உங்களுக்குப் பிடித்த ஒரு இனிமையான சூழலை கற்பனை செய்து கொஞ்ச நேரம் பகல் கனவு காணுங்கள். தப்பில்லை !

  1. உற்சாகமான உடல் அவசியம்

மன அழுத்தம் இல்லாமல் இருக்க வேண்டுமெனில் உடல் உற்சாகமாய் இருக்க வேண்டும் என்கிறது மருத்துவம் ! அதனால் தான் மன அழுத்தம் தவிர்க்க உடற்பயிற்சியை வல்லுனர்கள் பரிந்துரை செய்கிறார்கள்.

உடலில் இரத்த ஓட்டம் சீராக இருந்தால் மனம் உற்சாகமாக இருக்கும். அதற்கு உடற்பயிற்சி கை கொடுக்கும். மூளையிலும், உடலிலும் ஆக்சிஜன் குறைவில்லாமல் இருந்தால் மூளை உற்சாகமாய் இருக்கும். அதற்கு மூச்சுப் பயிற்சி, யோகா, தியானம் போன்றவை கை கொடுக்கும்  ! உடலைப் பேணுவதன் மூலமாக மன அழுத்தத்தை விரட்டும் வழி இது !

  1. மன அழுத்தமும், மருத்துவமும்

நமக்கு மன அழுத்தம் வரும்போது உடல் ஸ்ட்ரெஸ் ஹார்மோன்களை வெளிவிடுகிறது ! இந்த ஹார்மோன்கள் உடலை உலுக்கி எடுக்கின்றன. குருதி அழுத்தத்தை எகிற வைக்கின்றன ! இதயத் துடிப்பை தாறுமாறாய் ஏற்றுகின்றன  ! குருதியில் சர்க்கரை அளவையும் அதிகரிக்கின்றன !

இது அப்படியே படிப்படியாய் தேங்கி, இதய நோய்கள், உடல் பருமன், மன நோய்கள், உடல் வலிகள் என பல்வேறு நோய்களை இழுத்து வரும். இவ்வளவு ஏன் ? பெண்களுக்கு மாதவிலக்கு தாறுமாறாகிப் போகவும் முக்கிய காரணம் மன அழுத்தம் என்கின்றனர் மருத்துவர்கள்.

  1. அதிர்ச்சி மன அழுத்தங்கள் !

ஒரு அதிர்ச்சிகரமான நிகழ்வைப் பார்ப்பதால் வரும் மன அழுத்தத்தை “போஸ்ட் ட்ரமாடிக் ஸ்ட்ரெஸ் டிஸார்டர் – PSTD என்கின்றனர். ரொம்ப மனசுக்குப் பிடித்தமானவர்கள் சட்டென இறந்து போனாலோ, ஒரு விபத்தையோ, வன்முறையையோ நேரில் பார்த்தாலோ, பாலியல் ரீதியான வன்முறையைச் சந்தித்தாலோ, அல்லது இப்படிப்பட்ட ஏதோ ஒரு கடினமான சூழல் காரணமாக உருவாகும் மன அழுத்தம் இது !

ஒருவகையில் துரதிர்ஷ்டவசமான சூழல் இது எனினும், இதிலிருந்து வெளி வரவேண்டியது அவசியம். நல்ல ஆரோக்கியமான நட்புகளை வளர்த்துக் கொள்வதும், பொழுதுபோக்குகளை அரவணைப்பதும், உடற்பயிற்சிகள் மூலம் தன்னம்பிக்கையை வலுவாக்குவதுமே வெளிவரும் வழிகள்.

  1. விட்டு விடுதலே பெற்றுக் கொள்தல் !

“கல்யாண வீடாயிருந்தா நான் தான் மாப்பிளையா இருக்கணும், சாவு வீடா இருந்தா நான் தான் பொணமா இருக்கணும். எந்த இடமா இருந்தாலும் மாலையும் மரியாதையும் எனக்குத் தான் கிடைக்கணும்” எனும் மனநிலை நிம்மதியின் எதிரி.

விட்டுக் கொடுத்தலும், இயல்பாய் வாழ்தலுமே மன அழுத்தத்தை விரட்டும் வழிகள். உங்களை மன அழுத்தத்துக்குள் தள்ளும் விஷயங்கள் என்னென்ன என பட்டியலிடுங்கள். சின்னச் சின்ன விஷயங்களை சரி செய்யுங்கள். தள்ளி விட முடிந்தவற்றை தள்ளி விடுங்கள்.

  1. மன்னியுங்கள் !

மன்னிப்பு மன அழுத்தமற்றவர்களின் தாரக மந்திரம். மன்னிக்கும் மனம் இருப்பவர்களுக்கு மன அழுத்தம் வருவதில்லை. அப்படியே வந்தாலும் அது அவர்களுக்குள் தங்குவதில்லை.

கணவன், பிள்ளைகள், தோழிகள், அலுவலகம், உறவினர்கள் என யார் தப்பு செய்திருந்தாலும் மன்னிக்கப் பழகுங்கள். அதை மனமார செய்யப் பழகுங்கள். மிகவும் கஷ்டமாய் தோன்றும் விஷயம் இது. ஆனால் பழகி விட்டால் ஈகோ இல்லாத இனிய மனம் உங்களுக்குச் சொந்தமாகும்.

  1. ஒழுங்கு நல்லது.

எல்லாவற்றிலும் அரக்கப் பரக்க ஓடி அரையும் குறையுமாய் இருப்பவர்களுக்கு மன அழுத்தம் சர்வ நிச்சயம். எட்டு மணி பஸ்ஸுக்கு 7.59க்கு ஓடுபவர்கள் ரிலாக்ஸாக இருக்க முடியாது. பல விஷயங்கள் இவர்களிடம் ஒழுங்கில்லாமல் இருக்கும்.

உதாரணமாக சாவியை எங்கே வெச்சேன் என 2 நிமிடம், செருப்பு எங்கே என 2 நிமிடம், புக்ஸ் எங்கே என இரண்டு நிமிடம் என எல்லாவற்றுக்கும் டென்ஷனாகி மன அழுத்தத்தை உருவாக்கிக் கொள்வார்கள். ஓடிப் போகும்போ பஸ் கிடைக்காது. அப்புறம் எல்லாத்துக்கும் மாமியார் தான் காரணம்ன்னு முணு முணுப்பில பி.பி இன்னும் எகிறும் !

கொஞ்சம் ஒழுங்கு பழகினால் இருக்கும் நேரத்தை சரியாய்ப் பயன்படுத்த முடியும், நேர மேலாண்மை மன அழுத்தமற்ற வாழ்க்கைக்கு உத்தரவாதம் தரும்.

  1. தூக்கம் முக்கியம்.

விடியற்காலைல எழுந்து ஓடியாடி வேலை செய்பவர்கள் பெண்கள். இரவில் நல்ல ஒரு எட்டு மணிநேர தூக்கம் இல்லாவிட்டால் எல்லாம் போச்சு ! நல்ல ஆழமான தூக்கம் மனதை அடுத்த நாளைக்காய் தயாராக்கும்.

உடலுக்கும், மனதுக்கும், மூளைக்கும் ஓய்வு ரொம்ப அவசியம். சரியாகத் தூங்காவிட்டால் உடல் சோர்வுடன் மனமும் சோர்வடையும். மன அழுத்தம் ஓடி வந்து உட்காரும். சூடாய் ஒரு கப் பால் இரவில் குடிப்பது, டிவி நேரத்தைக் குறைப்பது, மனதை இயல்பாய் வைத்திருப்பது இவையெல்லாம் பெரியவர்கள் சொல்லும் அட்வைஸ்..

  1. பெண் என்பது பெருமை !

“பெண்ணாய்ப் பிறந்து விட்டோமே” எனும் சுய பச்சாதாபம் பலருக்கும் மன அழுத்தத்தைக் கொண்டு வருவதாக ஒரு ஆய்வு சொல்கிறது. பெண் என்பது பெருமைப்பட வேண்டிய சமாச்சாரம். ஒரு மனிதனிடமிருந்து உயிரை வெளியே எடுத்தால் அவன் பிணமாவான். ஒரு பெண்ணிடமிருந்து உயிரை எடுத்தால் அவள் தாயாகிறாள் !  பெண் மட்டுமே அந்தப் பெருமைக்குரியவள் !

மங்கையராய்ப் பிறப்பதற்கே நல் மாதவம் செய்திடல் வேண்டுமம்மா.. என்றே உளமார நினையுங்கள் அதுவே உண்மை. தேவையற்ற மன அழுத்தங்களை நீங்களாக உருவாக்கிக் கொள்ளவேண்டாம் !

  1. எதிர்பார்ப்புகள் குறையட்டும்

இன்றைக்கு உலகில் இருக்கின்ற நோய்களில் 75 முதல் 90 சதவீதம் நோய்களுக்குக் காரணம் மன அழுத்தம் என மிரட்டுகிறது ஆராய்சி ஒன்று ! இந்த மன அழுத்தத்தைக் குறைக்க ஒரு எளிய வழி எதிர்பார்ப்புகளைக் குறைத்துக் கொள்வது தான்.

அடுத்தவர்களோடு நம்மை ஒப்பீடு செய்யாமல் இருந்தாலே பாதி எதிர்பார்ப்புகள் குறைந்து போகும். டிவி சொல்வதைக் கேட்காமல் பெற்றோர் சொல்வதைக் கேட்டால் தேவையற்ற எதிர்பார்ப்புகள் ஓடியே போய்விடும். “எது இல்லாமல் ஒரு மனிதனால் வாழ முடியுமோ, அது இல்லாமல் வாழ்வதே நல்ல வாழ்க்கை” எனும் தலைவர் மொழிகள் மனதில் இருப்பது நல்லது !

  1. வித்தியாசமான காரணங்கள்.

பொதுவான மன அழுத்தங்களுக்கு பல காரணங்கள் உண்டு. ஏமாற்றம், பயம், நிராகரிப்பு, எரிச்சல், ஓவர் வேலை, கடன்,தேர்வு, உறவு, நட்பு இப்படி இந்தப் பட்டியல் நீண்டு கொண்டே போகும். ஆனால் இது மட்டுமல்ல, சில வித்தியாசமான காரணங்கள் கூட மன அழுத்தம் தரலாம்.

உதாரணமாக, சிலருக்கு சத்தம் அலர்ஜியாக இருக்கும். அதிக சத்தம் கேட்டால் டென்ஷனும் மன அழுத்தமும் வந்து சேர்ந்து விடும். சிலருக்கு வெளிச்சம் மன அழுத்தத்தைத் தருமாம். சிலருக்கு சில வாசனைப் பொருட்கள் மன அழுத்தம் தருகின்றனவாம். மன அழுத்தத்துக்கு என்ன காரணம் என்பதை அறிந்து அதை விலக்குங்கள் !

  1. தவறான பழக்கங்கள்.

பெரிய நிறுவனகளிள் அங்கொன்றும் இங்கொன்றுமாக காண முடிகிறது தம்மடிக்கும் பெண்களை ! மேலை நாடுகளில் சர்வ சாதாரணமான இந்தக் காட்சி தமிழகத்திலும் இப்போது காண முடிவது ஒரு அதிர்ச்சி ! நல்ல விஷயங்களில் முன்னேற்றம் இருப்பதே உண்மையான பெண் முன்னேற்றம்.

நிகோடின் மன அழுத்தத்தை அதிகரிக்கும் என்கின்றன பல ஆய்வு முடிவுகள். அப்படியே போதைப் பழக்கம், தண்ணியடிப்பது போன்ற விஷயங்களெல்லாம் “திரில்” என பழக நினைத்தால் மன அழுத்தமும் வந்து தொற்றிக் கொள்ளும் !

  1. நல்ல விஷயங்களில் மன அழுத்தம்

என்ன கொடுமை சரவணன் இது ? நல்ல விஷயங்களில் கூடவா மன அழுத்தம் வரும் ? என நீங்கள் புலம்புவது கேட்கிறது ! வரும் என்பது தான் பதில் !

குறிப்பாக திருமணம் செய்து கொள்ளப் போகிறீர்கள் என வைத்துக் கொள்ளுங்கள். நல்ல விஷயம் தானே ? பலரும் இந்தக் காலகட்டத்தில் மன அழுத்தமாய் இருப்பார்களாம். ஒரு பதவி உயர்வு கிடைக்கிறது என வைத்துக் கொள்ளுங்கள். அப்போதும் மன அழுத்தம் சிலரை வாட்டுமாம்.

இத்தகைய நேரங்களில் தான் பலருக்கு ஆன்மீகம் கைகொடுக்கிறது. அல்லது பெற்றோர், நல்ல நண்பர்கள், வழிகாட்டிகள், பெரியவர்கள் என நம்பிக்கையானவர்களோடான உரையாடல் கை கொடுக்கும் !

  1. தகராறில்லாத தாம்பத்யம்.

கட்டில் வாழ்க்கை ஆரோக்கியமாக இருந்தால் வீட்டில் வாழ்க்கை அழுத்தமற்றதாக இருக்கும். தாம்பத்யம் தகராறாய் இருந்தாலோ வீட்டில் சமநிலை தடுமாறும். இன்றைய வாழ்க்கை முறை அதிக நேரம் வேலை செய்ய வேண்டிய சூழலை உருவாக்குகிறது. ஆனால் அதற்கு விலையாக தாம்பத்யத்தைக் கொடுத்தால் தம்பதியரை மன அழுத்தம் பிடிக்கும்.

கணவன் மனைவி கட்டில் உறவு ஒரு ஸ்ட்ரெஸ் ரிலீவர் என்கின்றனர் மருத்துவர்கள். எனவே கல்யாணம் ஆகி ரொம்ப நாள் ஆச்சு, வேலை இருக்கு, குழந்தை பொறந்துடுச்சு. அது இது என காரணங்கள் சொல்லாமல் தாம்பத்ய வாழ்க்கையைக் கட்டி எழுப்புங்கள்.

  1. தாய்மையா ? கவனம்.

“புள்ளதாச்சி கிட்டே போயாடா இதையெல்லாம் சொல்லுவே.. போக்கத்த பயலே…” என பல்லில்லாத கிழவிகள் பேசுவதை கிராமங்களில் அடிக்கடிக் கேட்கலாம். தாய்மை நிலையில் இருக்கும் பெண்கள் நல்ல இனிமையான விஷயங்களையே கேட்கவேண்டும் என்பார்கள். காரணம் அவர்களுக்கு மன அழுத்தம் வரக் கூடாது என்பது தான்.

மாயோ கிளினிக்ஸ் என்பவர் அமெரிக்காவிலுள்ள ஒரு குழந்தைகள் நல மருத்துவர். “தாய்மை நிலையில் இருக்கும் பெண்கள் மன அழுத்தமடைந்தால் அது குழந்தைகளையும் நேரடியாகப் பாதிக்கும்” என எச்சரிக்கிறார் அவர். அதனால் தான் கர்ப்பகாலத்தில் பெண்கள் நல்ல இசை, நல்ல நூல்கள், நல்ல கவனிப்பு என மனதை இதமாக்கும் விஷயங்கள் பெற்றுக் கொள்வது அவசியம்.

  1. பாசிடிவ் மனநிலை.

மன அழுத்தம் இரண்டு விதம். ஒன்று நமக்கு வெளியே நடக்கும் விஷயங்களால் நமக்கு வருவது. பெரும்பாலும் நம்முடைய கன்ட்ரோலில் அது இருப்பதில்லை. இன்னொன்று நம்முடைய உள்ளுக்குள்ளே எழுவது. இது முழுக்க முழுக்க நமது கட்டுப்பாட்டில் உண்டு. மனம் நேர் சிந்தனைகளினால் வலுவாக இருந்தால் வெளிப்புற செயல்கள் கூட நம்மை அதிகம் பாதிக்காது !

உதாரணமாக, சாலையில் உள்ள டிராபிக் கூட உங்களுக்கு மன அழுத்தம் தரலாம். ஆனால் உங்கள் மனம் ஓத்துக் கொண்டால் மட்டும் ! தாழ்வு மனப்பான்மையில் உழலாமல், பாசிடிவ் மனநிலையுடன் வாழ்க்கையை எதிர்கொள்பவர்கள் இதை எளிதில் வெற்றி கொள்வார்கள்.

மன அழுத்தத்தைக் காரணிகள் 10 சதவீதமும், நமது மனம் 90 சதவீதமும் நிர்ணயிக்கின்றன என்கிறார் சார்லஸ் ஸ்வின்டால் எனும் நிபுணர். எனவே மனதை வலுவாக்குங்கள்.

  1. மூன்று வகை !

மன அழுத்தம் அதனுடைய தன்மை அளவில் மூன்று வகை. அக்யூட் ஸ்ட்ரெஸ் – என்பது திடீரென நிகழும் ஒரு செயல் உங்களுக்குத் தருகிற மன அழுத்தம். இது பெரும்பாலும் தற்காலிகமானது. “இன்னிக்கு வேலை முடிய ரொம்ப லேட் ஆச்சு” டைப் திடீர் டென்ஷன்கள் இந்த வகை. அது நாளை சரியாகும் ! இந்த வகை அழுத்தம் தொடர்ந்து கொண்டே இருந்தால் அது “எபிசாடிக் அக்யூட் ஸ்ட்ரஸ்” ஆக மாறும். “டெய்லி வேலை முடிய லேட் ஆகுது” என்பது போல !

குரோனிக் ஸ்ட்ரெஸ் என்பது கொஞ்சம் டேஞ்சர் வகை. சின்ன வயசிலேயே வறுமை, பட்ட காலிலேயே படும் போல தொடர் தோல்விகள், வேலையே கிடைக்கல போன்ற வகை இது !. டிராமிக் ஸ்ட்ரஸ் – என்பது ஏதோ ஒரு அதிர்ச்சி தந்த மன அழுத்தம்.

எதுவானாலும், மன அழுத்தம் ஆபத்தானது என்பதை உணருங்கள். !

  1. குழந்தைகளும், மன அழுத்தமும்

குழந்தைகள் உங்களை இமிடேட் செய்யும் ! உங்களுடைய வாழ்க்கை முறையையே குழந்தைகளும் பழகும். உங்கள் வீட்டில் அழுத்தமான சூழலா ? குழந்தையையும் அது பாதிக்கும். உங்கள் வீட்டில் சண்டையா ? குழந்தையின் மனதை அது பாதிக்கும். இப்படி குழந்தையின் மன அழுத்தத்தின் முக்கியக் காரணி நீங்களே !

குழந்தைகளை நண்பர்களாகப் பழகுங்கள். “எப்பவும் நீதான் ஃபஸ்டா வரணும்” என்பது போன்ற முட்டாள் தனமான கட்டளைகளை இடாதீர்கள். தோல்வியும் வெற்றியும் சகஜம் எனும் மனநிலையை குழந்தைகளுக்குள் வளர்த்துங்கள். இரண்டையும் கற்று வளரட்டும் பிள்ளைகள்.

  1. நகைச்சுவை உணர்வு நல்லது.

நல்ல நகைச்சுவை உணர்வு உடையவர்களுக்கு மன அழுத்தம் எளிதில் வருவதில்லை. அவர்கள் வாழ்க்கையை ரொம்பவே இயல்பாக எடுத்துக் கொள்வார்கள். ரொம்ப மூடி டைப் ஆபத்தானது.

சிலர் சொல்வார்கள், “என் பையன் ரொம்ப அமைதி, யார் கூடவும் பேச மாட்டான், தான் உண்டு தன் வேலை உண்டுன்னு இருப்பான். சமத்து ! ” என. அது ஆபத்து ! நண்பர்கள், உறவினர்கள், பெற்றோர் என கலகலப்பாக இருக்கும் பிள்ளைகளுக்கு மன அழுத்தம் வராது. கவனியுங்கள் !

நல்ல காமெடி படம் போட்டாச்சும் கொஞ்ச நேரம் சிரிங்க. மன அழுத்தம் ஓடியே போய்விடும் என்கிறார் மனநல நிபுணர் லீ பெர்க்.

  1. வெயிட்டிங் டைம் நல்லது !

எங்கேயாச்சும் போனா “வெயிட்டிங் டைம்” பலருக்கும் எரிச்சல் தரும் விஷயம். அரை மணி நேரம் வரிசையில் காத்திருக்க வேண்டியிருந்தால் அவர்கள் டென்ஷனாகி மன அழுத்தத்தை கூப்பிடுவார்கள்.

மேலை நாடுகளில் மக்கள் அலட்டிக் கொள்வதில்லை. சட்டென ஒரு புத்தகத்தை எடுத்து வாசிக்க ஆரம்பித்து விடுவார்கள். நீங்களும் அதையே செய்யலாமே ? ஒரு புக் படிக்கலாம், அன்றைய தினத்தைப் பற்றி சிந்திக்கலாம், மூச்சுப் பயிற்சி செய்யலாம், ஆன்மீக வாதிகள் செபம் செய்யலாம் எவ்வளவோ செய்யலாமே ! “கறை நல்லது” மாதிரி, “வெயிட்டிங் டைம் நல்லது” என சொல்லிப் பழகலாமே !

  1. நல்லதையே சிந்தியுங்கள்

சிலருக்கு ஒரு கெட்ட பழக்கம் உண்டு. எப்போதாவது நடந்த ஒரு தப்பைப் பற்றியோ தோல்வியைப் பற்றியோ சிந்தித்துக் கொண்டே இருப்பார்கள். எல்லாவற்றையும் அதிலிருந்தே தொடங்குவார்கள். அதற்கு அப்புறம் எவ்வளவோ நல்ல விஷயங்கள் நடந்திருக்கும் அதையெல்லாம் விட்டு விடுவார்கள்.

அந்த மனநிலை உங்களுக்கு இருந்தால் முதலில் அதைத் தூக்கிப் பரணில் போடுங்கள். “நம்மால் மாற்ற முடியாதவைகளைப் பற்றிச் சிந்திக்கக் கூடாது” என்பது மகிழ்ச்சியின் பாலபாடம். அதை மனதில் கொள்ளுங்கள்.

  1. பிறரை நேசியுங்கள்.

பிறரை மகிழ்ச்சிக்குள்ளாக்கும் ஏதேனும் ஒரு செயலை தினமும் செய்ய முயலுங்கள். அது உங்களை உற்சாகமாக்கும். பிறர் நலப் பணிகள் செய்பவர்களுக்கு மன அழுத்தம் எளிதில் வருவதில்லை. உதவி தேவைப்படுபவர்களுக்கு மனமார உதவி செய்து பாருங்கள். மனம் ரொம்ப பிரஷாகும்.

அதே போல உங்களுக்குப் பிடித்தமான செயல் ஒன்றையேனும் தினமும் செய்யுங்கள். எழுதுவது ஒரு நல்ல பொழுது போக்கு. மன அழுத்தத்தை அகற்றும் ஒரு நல்ல வழி அது. அதையும் நீங்கள் செய்யலாம்.

  1. வார இறுதிகள், வரம்

வார இறுதிகளை குடும்பத்தினரோடு முழுக்க முழுக்க செலவிடுங்கள். வெளியே போய் சாப்பிடுவது, கடற்கரையில் போய் விளையாடுவது என நேரத்தைச் செலவிடுங்கள். வார இறுதிகளில் அலுவலக வேலைகளை விட்டுவிடுங்கள். வேலைகள் உங்களுக்காகக் காத்திருக்கும் என்பதே யதார்த்தம்.

அலுவல் நாட்களின் அழுத்தங்களெல்லாம் வார இறுதிகளில் வடிந்து போனால் அடுத்த வாரம் வேலை செய்ய உற்சாகம் கிடைக்கும் என்பதை நினைவில் கொள்ளுங்கள். !

இலக்கியம்