ஒவ்வொருவர்க்கும் ஒரு பார்வை இருக்கும்.
ஒவ்வொரு கலர்க் கண்ணாடி் இருக்கும்.
அதன் வழியேதான் அவர்கள் பார்ப்பார்கள்.
மற்றதெல்லாம் அவர்களுக்குத் தெரியாது.

எங்கள் அலுவலகத்திற்குச் செல்பேசி இயந்திரங்கள்
லாரியிலே வந்தன.

வந்த லாரிக்காரனுக்கு் முகவரி தெரியவில்லை.
உள்ளூர் லோடுமேன் ஒருவனிடம் கொடுத்து
என்னிடம் முகவரி கேட்டான்.

நானும் ஒரு ஐந்து நிமிடம் அவனிடம் பேசி அந்தத்
தளவாடச் சாமான்களை
எங்கே இறக்க வேணும் என்று
அடையாளம் எல்லாம் காட்டிச் சொல்லிப் பார்த்தேன்
அவனுக்கு விளங்கவே இல்லை. . .
உனக்கு ஜேஸ்மின் கிளினிக் தெரியுமா,
அதை ஒட்டிய தெரு ?

அவனுக்குத் தெரியவில்லை.
மவுன குரு மடாலயம் தெரியுமா,
அதற்கு எதிர்த்த தெரு ?

அதுவும் அவனுக்கு விளங்கவில்லை.
பத்திர ஆபீஸ் இருக்குமே அந்தத் தெரு ?

அவன் குழம்பினான்.

கடைசியிலே ஒரு ஐடியா வந்தது.
அரசன் ஒயின்ஸ் கடைக்கு எதிர்த் தெரு.

பளிச்செனப் புரிந்து கொண்டான் அவன்.

மனிதர்களிலே பல வகை, பல தரம்
எல்லோர் அறிவும் ஒன்று போல் இல்லை.
அவன் அறிவு எந்த அளவுக்கு இருக்கிறதோ
அந்த அளவுக்கு நாம் கீழே இறங்கிச் சொல்ல வேண்டி இருக்கிறது.

சைவத்தையும், சன்மார்க்கத்தையும் பேசி
விளங்க வைக்க முடியாததை
பாண்டி முனியின் பேர் சொல்லிச்
சிலருக்குப் புரிய வைத்து விட முடிகிறது.

அது அவர் அவர்கள் தராதரம்.

இந்து சமயம் சைவத்தைத் தன்னோடு
அரவணைத்துக் கொண்டு ஒன்றெனச் சொன்ன போதும்
சன்மார்க்கம் மட்டும் கொஞ்சம்
தனித்தே காணப் படுகிறது.

எல்லோர்க்கும் இங்கே ஒரே மருந்து இல்லை.
அனைவர்க்கும் இருப்பது ஒரே நோயும் இல்லை.

ஒருவரது மருந்து இன்னொருவருக்கு ஒவ்வ மறுக்கிறது.
இன்னொருத்தருக்கு விஷமாய்ப் போய் விடுகிறது.

இந்து மதம் மனிதரின் எல்லாத் தரங்களுக்கும்
ஒவ்வொரு நெறிமுறையை,
வழிபாட்டு முறையை
வகுத்துத் தந்திருக்கிறது.

ஆடு, கிடா பலி தரும் போது
சில சன்மார்க்கிகள்
பலி இடுபவர்களின் காலிலே கூட
விழுந்து,
' வேண்டாம் வேண்டாம், உயிர்க்கொலை . . .!'

என மன்றாடுவதைக் கேள்விப் பட்டிருக்கிறேன்.

இது தேவையற்றது.
சன்மார்க்கிகள் தங்கள் பிரசங்கங்களை
தங்கள் சங்கங்களிலே வைத்துக் கொண்டால் போதும்.
கருத்து தகுதியானவரைச் சென்றடையும்.

அதை விடுத்துக் கொல்லதே - என மன்றாடினால்
பலிதரும் பூசாரி ஆத்தா சொன்னாள் என்று
பட்டாக்கத்தியை உங்கள் பக்கம் திருப்ப எவ்வளவு நேரம் ஆகும்.?

அப்பவும் கூட, நீங்கள் தான்சன் மார்க்கிகள் ஆச்சே,
அருள் தயவு என்றுதான் உச்சரிப்பீர்கள் தவிர
எதிர்க்கவும் மாட்டீர்கள்
ஓடவும் மாட்டீர்கள்.

அது அவர்கள் நெறி, அவர்கள் கோட்பாடு
அதில் குறுக்கிட நாம் யார் ?

உயிர் கொலை மறுத்தல்
புலை கொலை தவிர்த்தல் எல்லாம்
தானாக உணர்ந்து வர வேண்டியது,
இதை எல்லாம் கெஞ்சிச் செய்யவைக்க முடியாது.

அது அவர்கள் நிலை.
அதற்கென்றே இந்து நெறி
மாடன், காடன், கருப்புசாமி முதலிய தெய்வங்களை
நியமித்திருக்கிறது.

என்றாவது ஓர் பிறவியில் அவர்கள் நெறிமாறி
அன்பு வழி வருவர்,
அது வரை என்ன அப்படி அவசரம் ?
இதெல்லாம் பரிணாம்ப் படி வர காலங்கள் ஆகும்.
திடுதிப் என்று மாற இது ஒன்றும் REVOLUTION இல்லை, EVOLUTION !

சைவ நெறி எப்பவும்
தவறாகவே புரிந்து கொள்ளப் பட்டு வந்திருக்கிறது
இற்றைக்குச் சைவ சமயம் என்று சொல்லிக் கொள்ளும்
பெரும்பாலோர் அசைவர்கள்.

சைவ நெறி - பெயரிலேயே சைவம் இருக்கிறது.
அது என்றைக்குமே புலை கொலையை ஏற்றதில்லை.
சைவ நெறியாளர்கள் எனச் சொல்லிக் கொண்டு
நெற்றில் முப்பட்டை அணிந்து கொண்டு
நடத்தரையனை வழிபட்டேன்
என்றால் அது விரயம்.

சிவனைத் தொழும் ஒரே காரணத்தால்
அவர்கள் சைவர்கள் ஆகி விட முடியாது.
புரிய வில்லையா,
இது கொஞ்சம் விவேக் காமெடி மாதிரி. .
எனக்கு எஸ்.பி.யைத் தெரியும் . . ஆனா
அவருக்கு என்னைத் தெரியாது

என்பது போல..

அனைத்து அக்கிரமமும பண்ணிவிட்டு
அப்பா அரசே ! எனத்
தொழுவதாற் பயனில்லை.
தொழும் குரலும் அவனைச் சென்றடையாது.

நிறையப் பேர் இப்படித்தான் மயங்குகிறார்கள்.
குரல் கொடுத்துவிட்ட நிம்மதி அவர்களுக்கு.

அது சென்றடைந்ததா என்று தெரியாது.

எல்லோர் மனத்தையும் புண்படுத்துவார்கள்.
சீண்டி வேடிக்கை பார்ப்பார்கள்.
பொறாமைப் படுவார்கள்.
வாய் திறந்தால் வஞ்சகம் பிரவாகமாகப் பாயும்
ஆனால் ஆலயம் செல்வார்க்ள, வணங்குவார்கள்.

ஆண்டவன் அருள் எங்கிருந்து கிட்டும்.?
அவர்கள் குரல் கேடடாற் போதும்,
காதிலே பஞ்சை வைத்து அடைத்துக் கொள்வான் இறைவன்

சைவர்களின் நிலை இப்படி என்றால்,
சன்மார்க்கிகளும் அதே மாதிரிதான்.

சன்மார்க்கம் என்றால் விளங்கிக் கொள்ளாமலே
சன்மார்க்கம் பேசுவார்கள்.
சன்மார்க்கி என்றால் சாவை வென்றவன்.
இறவாப் பெரு நெறியாளன்.
சாவா வரம் எனைப் போல் சார்ந்தவரும்
தேவா நின் பேர்அருளை என்போலப் பெற்றவரும் எவ்வுலகில்
யாவர் உளர் சற்றே அறை !

-என்று வள்ளல் பிரான் பாடுவதைப் பாருங்கள்.

அவர் காலத்திலேயே சாவை வென்ற மனிதன்
அவரைத் தவிர யாரும் இருக்கவில்லையாம்.

இராமலிங்க வள்ளல் காலத்தில் அவரே சன்மார்க்கி.
இந்தக் காலத்தில் எவன் இறப்பறுத்து இருக்கிறானோ அவனே சன்மார்க்கி.

யாரேனும் சன்மார்க்கி இருந்தால் சொல்லுங்கள்
நானும் தெரிந்து கொள்கிறேன்.

சன்மார்க்கக் கொள்கைகள் ஒருசிலவற்றைப் பின்பற்றுவதால் மட்டுமே
யாரும் சன்மார்க்கி ஆகி விட முடியாது.

புலை தவிர்த்து, வெள்ளையாடை தரித்துவிட்டால்
சன் மார்க்கி ஆகி விட முடியுமா ?

எங்கள் பக்கத்து வீட்டுக் கொல்லையிலே
அம்மா என்றழைக்குது ஒரு வெள்ளை நிறப் பசு,
அது சன்மார்க்கியா?

சன்மார்க்கம் என்பது அருள் தயவால்
மனித உயிர் மட்டும் அல்ல,
எவ்வுயிரையும் ஒருமையாய் உன்னி உவப்பது . .

அப்படி உன்னும் போது எம்பெருமான்
எங்கிருத்தாலும் சரி,
கோகழி ஆண்டாலும் சரி,
பொன்னம்பலத்தே நடனம் செய்தாலும் சரி,
எல்லாவற்றையும் பாதியிலேயே போட்டது போட்டபடி விட்டுவிட்டு
உங்கள் உள்ளத்தில் பேரொளிப் பிழம்பாக்க்
குடி இருக்க ஓடோடி வரக் காத்திருக்கிறார்.

அப்படி அவர் உள்ளம் புகுந்தால் பிறப்பும் அறும்
அத்தோடு இறப்பும் அறும்
உடல் ஒளி வண்ணமாய் பொலியும்.
இதுதான் சாவாக் கலை நெறி 1
இதுதான் சன்மார்க்கம் !

இப்போது சொல்லுங்கள் உலகில் எங்கே எந்த சன்மார்க்கி
இருக்கிறான் என்று ?

நாம் எல்லாம் எந்த நெறி ஆயினும் ஆகட்டும்
எந்த மதம் ஆயினும் ஆகட்டும்
அவர் அவர் தரத்திற்கு ஏற்ப
அடைய முயற்சித்துக் கொண்டிருக்கிறோம், அவ்வளவே.

தரம் என்று இங்கே நான் சொல்லுவது இதுதான்.
பாண்டி முனிக்கு பலி தருபவன் LKG CLASS
அய்யப்பன் கோவிருக்குப் போம்போது மட்டும்
அசைவம் தவிர்ப்பவன் UKG CLASS

நெஞ்செல்லாம் வஞ்சகமும் சூதும்
ஆனால் சுத்த சைவம்.
முட்டை மட்டும் சாப்பிடலாமாம்,
ஆரோ ஒரு ஆச்சாரியார் சொன்னாராம்
இவர்கள் எல்லாம் PRIMARY SCHOOL.

இப்படியே சொல்லிக் கொண்டே போகலாம்,
யார் ஹை ஸ்கூல், யார் யார் காலேஜ படிப்பு படிக்கிறார்கள்
என்று உங்கள் கற்பனைக்கு விட்டு விடுகிறேன்.

சன் மார்க்கி மட்டும் P.Hd.,

நீங்க்ள எந்தத் தரத்தில் இருந்தாலும் சரி
நமது இந்து மதம் எல்லாநிலைக்கும் இடம் கொடுத்திருக்கிறது
ஆனால் ஒன்று மட்டும் உறுதி செய்து கொள்ளுங்கள்
அடுத்த நிலைக்கு வரப் பாருங்கள்,

முடியவே முடியாது பெயிலாகிப் பெயிலாகி
அதிலேயேதான் கிடப்பேன் என அழும்பு பண்ணினால்
அது உங்கள் இஷ்டம் !
காட்டுவழி தன்னில் ஒரு கூட்டம் போச்சு
கார் இருளில் ஓர்உருவம் தெரியலாச்சு
கூட்டத்தில் ரவுடி அதை முரடன் என்றான்
குடித்தவனோ இல்லை அது மொந்தை என்றான்
வாட்டமுடன் வாலிபனோ தலைவி என்றான்
வரிமழலைக் குழந்தைகளோ பேய்பேய் என்றார்
போட்டியிலே பொழுதெல்லாம் விடிஞ்சு போச்சு
புளிய மரத் தூர் என்றே புரியலாச்சு !

பொருள் ஒன்று . .!
ஆனால் ஒவ்வொருத்தருக்கும்
அவர் அவர் வளர்ச்சிக்கும், நிலைக்கும் தக்கபடி
எப்படி எப்படி மாறி மாறித் தோற்றம் அளிக்கிறது பாருங்கள் !

அதே மாதிரிதான் இப்போது ஒரு கேள்வி . .

பன்னிரண்டு என்ற எண்ணின் சிறப்பு என்ன ?

ஆளாளுக்கு ஒன்று சொல்வார்கள்.

ஜோசியனைக் கேட்டால் பன்னிரண்டு இராசிகள் என்பான்
தீர்த்தமாடுபவனோ, அதுவா மாமாங்கம் என்பான்
முருக பக்தனோ கந்தப் பெருமானின் திருக் கரங்கள் என்பான்.
மாணவன் சொல்வான் பன்னிரண்டு அங்குலம் ஒரு அடி.
நீங்களும் ஏதாவது சொல்ல முயல்லாம்.

ஆனால் சைவர்கள் இருக்கிறார்களே,
அவர்களிடம் கேட்டால் உடனே சொல்வார்கள்
பன்னிரு திரு முறைகள் என . .

எனக்கு ஒன்று மட்டும் புரியவே இல்லை,
இந்தச் சைவர்கள் விடாப் பிடிவாதக் காரர்கள்
வளர்ச்சி என்ற ஒன்று கிடையவே கிடையாது என வாதிப்பவர்கள்.

தெரியாமல்தான் கேட்கிறேன்,
இந்த நம்பியாண்டார் நம்பி அவர் காலத்திலேயே
சைவத்திருமுறைகளை வரன் முறைப் படுத்தித்
தொகுத்தாலும் தொகுத்தார்,
பன்னிரு திருமுறைகள் என . . .

கெட்டியாகப் பிடித்துக் கொண்டார்கள்,
இந்தச் சைவர்கள் என்று தங்களை அழைத்துக் கொள்பவர்கள் !

என் கேள்வி எல்லாம் இதுதான் . .!
ஏன், நம்பி யாண்டார் நம்பிக்கு அப்புறம் யாரும்
சிவனடியார்களே பிறக்கவில்லையா ?
பிறந்து எதுவுமே பாட வில்லையா ?

அருட் பனுவல்கள் எதுவுமே இந்த ஒரு ஆயிரம் வருஷகாலமாக
உதயமாகவே இல்லையா ?

அவர் தொகுத்தால் தொகுத்ததுதானா?
அப்புறம் சைவ சமய இலக்கியம் ஏன் வளரவே இல்லையா ?
பன்னிரு திருமுறை ஏன் பதிமூன்று ஆகக் கூடாது ?
இதென்ன வறட்டுப் பிடிவாதம் ?

இதே போல்தான் நாயன் மார்கள் எண்ணிக்கையும் !

பெரிய புராணத்திலே சேக்கிழார் வகைப் படுத்தி விட்டார் என்ற
ஒரே காரணத்துக்காக வெறும் 63 மட்டுமே என
நிறுத்திக் கொள்வது அபத்தம் !

அல்லது வேறு சிவனடியார்களே வரக் கூடாது
இந்த சைவ சமய சாம்ராஜ்யம் இதற்கு மேல் வளரக் கூடாது
என்கிற நலலெண்ணமா ?

இதே போல்தான் நம் தமிழர்கள் எல்லாத் துறையிலும் . .!
சித்தர்கள் மொத்தம் பதினெட்டே பேர்,
ஏன் பத்தொன்பதாக எவனும் வந்து விடக் கூடாது
என்கிற தனக்கு மட்டுமே உரிமை என்கிற நினைப்பா ?

இப்படிக் குறுகலாகக் கணக்குப் ப்ண்ணிப் பண்ணியே
வள்ளலாரை ஓரம் கட்டி விட்டார்கள் சைவர்கள் !
இதுதான் நிசம், இதுதான் உண்மை !

வள்ளலாரின் அருட்பாடல்கள் மொத்தம் ஆறு திருமுறைகள் !

சைவம் சரியான படி புரிந்து கொள்ளப் பட்டிருக்குமேயானால்
ஏற்கனவே உள்ள பன்னிரு திரு முறைகளோடு இந்த
ஆறையும் சேர்த்து பதினெட்டுத் திரு முறைகள்
ஆக்கி இருக்கலாம்தான்.

பதினெட்டு என்பது நமக்கு ஒன்றும் புதிது இல்லையே,
மங்கலகரமான எண் ஆயிற்றே,
பதினெண் கீழ்க் கணக்கு நூல்கள்,
பதினெண் மேல்க் கணக்கு நூல்கள்,
சில கோவில்களின் பதினெட்டுப் படிகள்,
கீதையின் பதினெட்டு அதிகாரம்,
மங்கலகரமான ஆடிப் பதினெட்டாம் பெருக்கு . . .
இத்தியாதி இத்தியாதியாக எத்தனை பதினெட்டுக்கள் ?

ஆனால் வெறி, வெறி
சைவ சமய வெறி, அப்படிச் செய்யமறுத்தது.
வள்ளல் பிரானின் புரட்சிகரமான கருத்துக்கள்,
வைதீகர்களின் மனத்தில் அச்சத்தை உண்டு பண்ணியது.

உள்ளம் உருக்கி நெக்கு விட வைக்கும் அவர்தம்
ஒண்டமிழ்ப் பனுவல்களால் தேவாரமும், எங்கே
திருவாசகமும் கோவிலில் பாடுவது நின்று போய் விடுமோ
எனத் தேவையில்லாத கவலையும் அவர்கள் மனத்தில் குடி கொண்டது.

சாஸ்திரங்களையும், சம்பிரதாயங்களையும் அவர் சாடிய சாடல்,
சாதி மத பேதங்களை எதிர்த்து அவர் உயர்த்திய அருட் பதாகை,
எல்லாம் சேர்ந்து ஒரு வீணான பயத்தை தோற்றுவிக்க

அதனால் பிறந்ததுதான் அருட்பா - மருட்பா போர் !

வள்ளல்பிரானின் ஆறு திரு முறைகளும்
சைவர்களின் துர்அதிஷ்ட்டம் பன்னிரண்டோடு சேர்த்து
பதினெட்டு என எண்ணப் பட வில்லை.

சன்மார்க்கர்களின் அதிஷ்ட்டம் ஆறு திருமுறைகளும் தனித்தே நின்றன,
வள்ளல்பிரான் தனித்திரு எனச் சொல்லிய வாசகம் போல . .!

நிசமான சன்மார்க்கி சமயத்தைப் பொய் என்பான்
ஆனால் சைவத்தை துவேஷிக்க மாட்டான்.

அதே போல்தான் நிசமான சைவனும், இன்னும் மேலே ஏறி
வரப் பார்ப்பான்
அல்லாமல் எனக்கு இந்தக் கல்லாரிப் படிப்பான POST GRADUATION போதும்
பி.ஹெச்.டி. ஆராய்ச்சிப் பட்டம் எல்லாம் வேண்டாம் எனச் சொல்லவும் மாட்டான்.

ஆனால் இரண்டுமே இரண்டு பேராலும்
தவறாகவே புரிந்து கொள்ளப் பட்டன . .

சில சைவ சமய வெறியர்கள்
யாழ்பாணத்து ஆறுமுக நாவலர் ஐயா அவர்களைக்
கொம்பு சீவித் தயார் படுத்தி முடுக்கிவிட்டுப்
பம்மி வேடிக்கை பார்த்தனர்.

கோர்ட் கூடி இருந்ததையும், வாதியான ஆறுமுக நாவலர் உட்பட
உள்ளே எல்லோரும் அமர்ந்திருக்கும் போது,
பிரதி வாதியான இராமலிங்க வள்ளல் உள்ளே கம்பீரமாக நுழைந்ததையும்,
அது கண்டு ஆறுமுக நாவலர் எழுந்து நின்று மரியாதை செய்த்தையும்,
இந்த நடப்புக்களை அவதானித்த நீதிபதி,

நீங்கள் ஏன் எழுந்து நின்றீர்கள் ?
- என வாதியாகிய ஆ.மு.நாவரைக் கேட்க

அவர் பெரியவர்,
அதனால் எழுந்து நின்றேன் - எனப் பதில் இறுக்க,

அவர் பெரியவர்தான் என்றால் அவர் பாடியதும்
அருட்பாதான் என நீதிபதி வழக்கைத் தள்ளுபடி செய்ததையும்

என்ன காரணம் தொட்டு எழுதாமல் விட்டார்
இங்கே நமது நிலா முற்ற நாவலர்
என்று எனக்குப் புரியவில்லை. . .

அதே சமயம் எப்போதோ நடந்து முடிந்த இந்தக் கதையை
முப்பது ஆண்டுகளுக்கும் மேல் அடுத்த நூற்றாண்டில்
கதிரைவேற்பிள்ளையை உசுப்பி விட்டு
சான்றுகளை எல்லாம் காட்டி ஜெயித்ததாகச் சொல்வது
எதை நிலை நிறுத்த என்றும் புரியவில்லை.

பல்லவநாட்டுக் கல்வெட்டிலே மகேந்திர வர்மன் வென்றான் எனவும்
சளுக்கிய நாட்டுக் கல்வெட்டிலே புலிகேசி வென்றான் எனவும்
உள்ள கதை போல
இந்த அருட்பா - மருட்பா போரானது அதற்கு அப்புறமும்
மறைமலை அடிகள் காலம் வரை நடந்தது

முடிந்து போய் விட்டது என நினைத்திருந்த எனக்கு
இப்போது நிலா முற்றத்து ஆன்மீகப் பகுதியிலே
நமது நாவலர் துவந்த யுத்தமாய் துவேஷித்து
ஆநிரை கவரும் படலமாக அரங்கேற்றம் செய்திருப்பது
மிகுந்த வேதனையையே அளிக்கிறது.

பதிலுக்கு நான் சைவத்தை நிந்தித்தேன் என்றால்
அது நான் ஏற்கனவே நடந்து கொண்டு இருக்கும் பாதை !

நல்ல ரோடான சன்மார்க்கம் அதோ தெரிகிறது என்று
இருக்கும் பாதையில் முள்ளா கொட்ட முடியும் ?

என் கண்ணை என் கைகளா குத்த முடியும் ?

முடியாது நாவலரே முடியாது.

சைவத்தின் பெருமையை நீங்கள் சொல்லுங்கள் !
இரண்டின் பெருமையையும் நான் சொல்கிறேன் !
திரும்பவும் சொல்கிறேன்,
நமக்குள் தர்க்கமோ சண்டையோ வேண்டாம் !

அது அண்ணன் - தம்பி அடிப்பது போல் ஆகி விடும்.

வள்ளல் பிரான் மரணமிலாப் பெருவாழ்வில் நிற்பவர்
மருட்பா போரில் இதுவரை ஈடு பட்ட எவரும்

சாவை வென்றதில்லை.

அவரை நிந்திப்பதற்குச்
செத்துப் போன எந்தப் பிண்டங்களுக்கும்
அருகதை இருந்ததில்லை.
சன்மார்க்கம் செய்த நல்ல காலம்
அருட்பாவின் ஆறு திரு முறைகளும் தனித்தே நின்றன.

ஆறு என்றால் நதி . .

கம்பன் சொல்கிறான் கவிதை எப்படி இருக்க வேண்டும் என்று . . .

சவியுறத் தெளிந்து தண் என்று
ஒழுக்கமும் தழுவிச் சான்றோர்
கவிஎனக் கிடந்த கோதா
வரியினை வீரர் கண்டார் . . .

சவி - என்றால் பிரகாசம்
சான்றோர் கவி எப்படி இருக்கும் ?
ஒளி ஒரு கோடிப் பிரகாசமாகக்
குளிர்ச்சியாக ஒழுங்காக இருக்குமாம் . . .!

அந்தக் கவிதை போல் தெளிந்த ஆறு கோதாவரி
இதை இராமன் பார்த்தானாம்.

இந்த ஆறாம் திருமுறை - அதாவது - தெளிந்த ந்தியாக உள்ள
ஆறாம் திருமுறை உங்களை நிச்சயம்
அந்த அருட் பெருங் கடலில் கொண்டு போய்ச் சேர்க்கும்.

பாதியிலே வற்றும் ஆறு அல்ல இது.
சோதிக் கடலிலே சேர்ந்து
உங்களையும் சேர்ப்பித்துச் சுற்றும் ஆறு

இந்த ஆறு மற்ற ஆறுகளை விட வித்தியாசமானதுதான்

எல்லோரும் விழித்துக் கொள்ளுங்கள்

விழித்திருப்போர் பயணப்படவென்றே
தனித்திருக்கும் ஆறு இது . .

இந்த ஆறு திரு முறைப் பாடல்களையும்
நீங்கள் நீங்கள் உங்களைக் கடைத்தேற்றும்
நதி எனக் கொண்டாலும் சரி
வழி எனப் பொருள் கொண்டாலும் சரி,

வாழ்த்துக்களுடன்,
அடுத்த கட்டுரையில் சில நாட்கள் சென்று சந்திக்கிறேன் . . .

-magudadheeban

நன்றி: Rivers and conflict | Streams of blood, or streams of peace | Economist.com: "Talk of thirsty armies marching to battle is surely overdone, but violence and drought can easily go together"

• உலக நாடுகளுக்கிடையே பாயும் நதிகளின் எண்ணிக்கை - 263
• கடந்த ஐம்பந்தாண்டுகளில், நதிநீர் பங்கீட்டுக்காக 400 ஒப்பந்தங்கள் கையெழுத்தாகி இருக்கிறது.
• பெரும்பாலான நாடுகள் அமைதியாக பிரித்துக் கொண்டாலும், தண்ணீருக்காக 37 வன்சம்பவங்கள் நிகழ்ந்துள்ளன.
• இந்த முப்பத்தேழில், 30 சண்டை இஸ்ரேலுக்கும் அண்டை நாடுகளுக்கும் நடுவில் மூண்டிருக்கிறது. ஜோர்டான் நதியின் மேற்பாகம் எவருக்கு சொந்தம்?
• எண்ணெயும் வைரமும்தான் தற்போதைக்கு சர்வாதிகாரிகளின் விருப்பமாக உள்ளன. கோங்கோ (Congo), அங்கோலா (Angola) போன்ற கொடுங்கோல் ஆட்சிநாயகர்களுக்கு தண்ணீரைக் கடத்துவது கஷ்டமான காரியம்.
• தமிழகப் புலவர்களுக்கு பிடித்த பாடுபொருளான சஹாரா பாலைவனத்திற்கு கூப்பிடு தூரத்தில் இருக்கும் நைல், நைஜர், வோல்டா, ஜம்பேசி எல்லாமே ஆபத்தான பகுதிகளாக ஐ.நா. அறிவித்துள்ளது.
• ஆனால், உலக வங்கியை நம்பியிருக்கும் ஆப்பிரிக்க நாடுகள் போல் அல்லாமல் சீனா தன்னிச்சையாக நதிகளை தடுத்தாட்கொண்டு, அணையெழுப்பி, திசைதிருப்பி, இயற்கையை சுதந்திரமாக கட்டுப்படுத்துகின்றது.
• ருசியாவின் ஆப் (Ob) நதியோடு இணையும் இர்திஷ் (Irtysh) நதியை நிறுத்துவதாகட்டும்; கஜக்ஸ்தானின் பல்காஷ் (Balkhash) ஏரியை நிரப்பும் இலி (Ili) நதியாகட்டும்... யாரும் தட்டிக் கேட்க முடியவில்லை. (கஜக்ஸ்தான் மக்கள்தொகை: 15 மில்./சைனா: 1300 மில்.)
• இதே ரீதியில் உலகம் வெம்மை அடைந்து கொண்டிருந்தால் மௌரிடானியா (Mauritania), மாலி, எத்தியிப்போ போன்ற நாடுகளில் தனிநாடு கேட்டுப் போராடுபவர்களின் பிரிவினைவாதம் வலுப்பட்டு கலகம் வெடிக்கலாம். ஆப்பிரிக்காவின் மக்கள் பெருக்கமும் இந்த இனப் போராட்டத்திற்கும் நன்னீர் பற்றாக்குறைக்கும் தூபம் போட்டு சாமரம் வீசுகின்றன.
• நேபாளத்தில் சமீபத்தில் நடந்த மாவோயிச வெற்றிக்கும், முன்னுமொரு காலத்தில் ஆப்கானிஸ்தானில் தாலிபான் வளர்ந்ததற்கும் கூட வறட்சிதான் காரணம்.